經過壹番查考，發現有三個不同的講法！
現代作家包笑天晚年寫個《大閘蟹史考》，引用了蘇州古籍收藏家吳訥士個說法：“凡捕蟹者，他們在港灣間，必設壹閘，以竹編成。夜來隔閘置壹燈火，蟹見燈光爬上竹閘，即在閘上壹壹捕之，甚為便捷。此是閘蟹之名所由來了。”搿搭塊個“竹閘”，應該屬於硬造個名稱，伊實際就是“籪”。勿少人儕曉得，垃拉六朝時期，吳淞江下遊個漁民發明了“滬”，搿種插拉河浜淺灘浪個竹柵欄，退潮個辰光可以攔牢魚蟹；到仔唐代，由於“滬瀆”經常作為地名出現拉詩賦當中，漁民們為了避免概念混淆，根據“滬”個“斷魚蟹之退路”功能，拿伊改稱“籪”，所以陸龜蒙個《漁具詩·序》明確講“滬，吳人今謂之籪”。搿歇，“籪”仍舊是江南農村個傳統漁具，《現代漢語詞典》對伊叠能解釋：“攔河插在水裏的竹柵欄，用來阻擋魚、蝦、螃蟹，以便捕捉。”既然“籪”從來嘸沒叫過“閘”，“大閘蟹”是因為捕捉工具而得名個說法就立勿牢腳。
前兩日，趁到上海郊區去參觀蟹塘個機會，問過壹位年長個蟹農：“老伯伯，妳曉得‘大閘蟹’名稱是哪能來個?？”搿個蟹農想了壹歇，撈起壹只螃蟹笑著講：“記得伲阿奶講過，雌蟹個半圓形臍蓋像‘大閘門’，雄蟹個尖臍蓋像‘小閘門’，伊拉身浪向儕有壹扇‘閘門’，所以叫做‘閘蟹’或者‘大閘蟹’。鎮文化中心搜集民間傳說個辰光，我拿叠樁事體寫下來了！”搿個蟹農看見我有眼勿相信，就從屋裏向拿出壹本鎮文化中心編個民間傳說集。搿個蟹農講個內容，垃拉前人筆記文獻搭仔相關書籍當中儕尋勿著，完全屬於壹種民間傳說。“大閘蟹”是因為長相而得名個說法盡管生動，但明顯屬於硬裝榫頭，實在經勿起推敲。
其實，“大閘蟹”是從“大煠蟹”演變過來個。三國時期張揖個《廣雅》提著：“煠，瀹也；湯煠也。音閘。”清代嘉慶、道光年間個蘇州文人顧祿，垃拉伊個《清嘉錄》裏向講：“湖蟹乘潮上，籪漁者捕得之，擔入城市，居人買以相饋貺，或宴客佐酒。有‘九雌十雄’之目，謂九月團臍佳，十月尖臍佳也。湯煠而食，故謂之‘煠蟹’。”埃個辰光，賣蟹人挑擔進城沿街叫賣，勿斷高喊“煠蟹唻大煠蟹”，成為秋天個壹道風景。搿搭塊個“煠”是指煮，現在個《新華字典》仍舊拿“煠”列為“炸”個異體字，並解釋成“拿食物放垃煮沸個油或水裏弄熟”。螃蟹壹般儕煠來吃，所以大家拿伊叫做“煠蟹”。老早黃浦江搭仔吳淞江出產個“清水蟹”，只頭大、肉結實，撥上海人稱為“大煠蟹”。大概是“煠”字比較生僻個緣故，日腳壹長，諧音個“大閘蟹”就慢慢替代了“大煠蟹”，並且壹直沿用到今朝。歸根到底，“大閘蟹”是因為烹制方法而得名。